19.08.2008
У нашай фотагалерэі - вашыя кадры з фестывалю і дасланыя нам украінскімі фатографамі прафесійныя здымкі фэсту. Знайдзі сябе на здымках і дашлі нам сваю гісторыю пра BeFree! Нагадваем, што пераможцы конкурсу "Рэпарцёры Be Free" атрымаюць у падарунак DVD з запісам другога дню рок-сцэны фэсту.
15.08.2008
Вялізарны дзякуй карыстальніку jek-hor за якасныя здымкі з фэсту, якія аздабляюць зараз нашую старонку. Калі вы лічыце, што ваш здымак варты быць пастаўлены на адкрыццё фэставага сайту, дасылайце нам! Апроч таго, усе здымкі з фэсту (за згодай аўтараў) мы будзем публікаваць у фотаальбоме нашага фэстывалю.
14.08.2008
Усе тэматычныя публікацыі пра фэст "Be Free" перанесеныя ў секцыю "Прэса", якая ўвесь час абнаўляецца. Калі Вы заўважылі, што мы прапусцілі нейкі артыкул, дасылайце на яго спасылку на fest.svabody@gmail.com! У нашай скарбонцы рэцэнзіяў ужо ёсць: "Наша Ніва", "Тузін Гітоў", "Еўрарадыё", "Советская Белоруссия", артыкулы ад Вітаўта Мартыненкі і Анатоля Мяльгуя, спіс будзе працягвацца. :-)
13.08.2008
Арганізатары фэсту Be Free запрашаюць усіх, хто быў на нашых канцэртах у Львове 9-10 жніўня, дасылаць на фэстаўскую скрыню fest.svabody@gmail.com свае фота і відэа-матэрыялы пра фэст або спасылкі да іх на YouTube i іншыя рэсурсы. Мы будзем выкарыстоўваць іх выключна з пазначэннем аўтарскіх правоў.
Мы таксама чакаем вашых гісторый пра Be Free: гэта могуць быць рэпартажы з канцэрту або намётавага гарадку, расповяды пра экстрэмальны турызм або лінгвістычныя практыкаванні на львоўскіх вуліцах, разважанні на тэму свабоды або параўнальных якасцяў украінскага баршчу, галоўнае - усё гэта павінна быць звязана з нашым фэстам. Мы прымаем усё - ад вершаў і падзякаў да канструктыўнай крытыкі :-), галоўнае для нас - ведаць, якім фэст стаў для ВАС, гледачоў і слухачоў Be Free.
Аўтары найлепшых - на думку арганізатараў ад Еўрарадыё, Беларускай музычнай альтэрнатывы і ініцыятывы "Студфармат" - рэпартажаў атрымаюць у падарунак DVD з відэаверсіяй другога дню фэсту (сцэна Парк).
Чакаем вашыя матэрыялы на fest.svabody@gmail.com!
11.08.2008
9-10 жніўня ў Львове на двух сцэнах у цэнтры гораду прайшоў міжнародны музычны фэст "Be Free". У фэсце прынялі ўдзел 29 гуртоў з Беларусі, Украіны, Польшчы і Францыі, выступы якіх наведалі (па афіцыйных дадзеных гарадскіх уладаў Львова) ад 3 да 5 тысячаў гледачоў штодзённа. Нягледзячы на папярэджанні украінскіх і беларускіх памежнікаў пра ўзмоцнены рэжым на мяжы, усе ўдзельнікі фэсту перасяклі украінска-беларускую мяжу без значных затрымак.
Сёлеташні Be Free стаў заўважнай падзеяй у беларускай культурнай сферы, выконваючы дзве функцыі: прадстаўлення свабоднага мікрафону прадстаўнікам незалежнай беларускай культуры і павышэння ўзроўня ведаў пра культуру суседзяў у творцаў і моладзі з Беларусі, Украіны і Польшчы. Важнай часткай фэсту стаў распаўсюд інфармацыі пра беларускія незалежныя культурныя і медыя-праекты і прыцягненне ўвагі да беларускай творчасці з боку суседніх краін.
Арганізатары "Be Free" дзякуюць усім партнёрам, удзельнікам і гасцям фестывалю і аб'яўляюць пра пачатак падрыхтоўкі да "Be Free - 2009". Старонка фэсту працягне дзейнічаць і папаўняцца на працягу году. Усе пажаданні, заўвагі і зваротную сувязь па фэсце -а таксама фота і відэаматэрыялы, якія мы размесцім з абавязковым пазначэннем капірайту - просім высылаць на скрыню фэсту fest.svabody@gmail.com.
07.08.2008
Намётавы гарадок у ландшафтным парку «Знесіння» пачне працу з пятніцы, 8 жніўня. Усе, хто прыедуць раніцай, могуць кіравацца туды, але ўсе рэсурсы будуць змантаваныя не раней за абед. Патрэбная будзе вашая дапамога!
Наш намётавы гарадок будзе ахоўваць львоўская абласная міліцыя. Іх праца - у інтарэсах кожнага, хто хоча спакойна пакінуць свой намёт і пайсці на канцэрт. : )
Міліцыя просіць прытрымлівацца наступных правілаў:
1. Упарадкаванае размяшчэнне намётаў згодна са схемай гарадка (будзе на месцы).
2. Адсутнасць алкаголю на самой тэрыторыі гарадка (пры гэтым нікога не будзе хваляваць, калі вы ў горадзе будзеце піць піва ці іншыя напоі. Галоўнае – не прыносіць іх на ноч у мястэчка).
3. Не захоўвайце у намётах асабліва каштоўныя рэчы: ноўтбукі, дарагія камеры, фамільныя каштоўнасці, антыкварныя кніжкі, вялікія сумы грошаў і г.д.
4. Калі вы прыязджаеце на машыне: досвед мясцовай міліцыі раіць вам ставіць машыны ў платных паркінгах у цэнтры Львова.
5. Не губляць бэджы або іншыя ідэнтыфікацыйныя карткі, якія вы атрымаеце як пасведчанне таго, што з'яўляецеся жыхаром намётавага мястэчка.
06.08.2008
Паважаныя сябры!
Па Вашых шматлікіх просьбах змяшчаем мапу Львова з пазначанымі месцамі сцэны, намётавага мястэчка.
Спадзяемся, гэта дапаможа Вам не заблукаць падчас правядзення Фэста.
02.08.2008
Выступ гуртоў Voo Voo (Польшча) і Гайдамаки (Украіна) на фэсьце Be Free ў Львове адбудзецца пры дапамозе польскага фэстывалю “Strefa Inne Brzmienia” (Люблін). “Strefa inne brzmienia” – гэта самая буйная музычна-мастацкая акцыя на Ўсходзе Польшчы, якая ставіць мэтай спрыяць працэсам эўраінтэграцыі.
Серыя спатканьняў і творчых майстэрняў мастакоў, музыкаў, фатографаў, што цягнулася ў Любліне 10 дзён, завяршаецца выпускам супольнага дыску гуртоў Voo Voo (Польшча) і Гайдамаки (Украіна), а таксама канцэртамі гэтых гуртоў у Любліне і Львове. Апошні адбудзецца 9 жніўня ў межах праграмы фэсту Be Free.
“Ідэя праекту - артыстычныя сустрэчы, якія апроч надзвычай цікавага мультыкультурнага творчага працэсу паміж артыстамі і сустрэчаў творцаў з публікай, пакінуць трывалы сьлед у выглядзе кніжкі з дыскам... Цыкл дэбатаў пад агульнай назвай “Межы Эўропы”, які ідзе разам з фэстывалем, прывязаны да актуальнага пытаньня пра эўрапейскую ідэнтычнасьць. Гэтае пытаньне – заданае ў Любліне, сталіцы памежнага рэгіёну Эўразьвязу, - паўстае вельмі выразна...
01.08.2008
Вызначылася тройка пераможцаў адбору маладых беларускіх гуртоў на фэст “Be Free”, які трываў з 9 па 31 ліпеня. На фэсце 9 жніўня выступяць дзве мінскія каманды – Imprudence i Wisp... – а таксама “Бан-Жвірба” з Гомелю. Imprudence i «Бан-Жвірба» заспяваюць па-беларуску, а Wisp… прадставяць слухачам англамоўную праграму, песня з якой - Simplify – ужо вядомая ўдзельнікам інтэрнэт-галасавання на старонцы euroradio.fm. Усяго ў конкурсе ўдзельнічала 39 заявак. Еўрарадыё прызначыла “прыз суцяшэння” аднаму з удзельнікаў фінальнай дзесяткі: беларускамоўныя песні гурта ESPRIT трапяць у ратацыю на станцыі. У будучыні сярод усіх канкурсантаў будуць адабраныя яшчэ некалькі гуртоў, чыя творчасць з’явіцца ў эфіры станцыі.
Па словах сябра аргкамітэту фэсту, лідэру гурта ULIS, Славы Кораня, “Усе
з 39 канкурсантаў заслугоўвалі увагі, усе з іх граюць даволі
прафесійна. Hам было вельмі складана выбраць нават з тых 10, што былі
абраныя галасаваннем – усе з іх заслугоўвалі таго, каб паехаць. Выбар
двух гуртоў з фінальнай тройкі быў абумоўлены іх досведам канцэртных
выступаў (Бан-Жвірба і Імпрудэнс ужо каля 10 год на сцэне), а гурт
Wisp..., хаця мы і не чулі ўжывую, даслаў нам вельмі шмат якасных
матэрыялаў, па якіх мы зрабілі выснову, што хлопцы здольныя годна
выступіць на фэсце.
31.07.2008
Напярэдадні фэсту “Be Free” Сашко Положіньскій - лідэр гурта “Тартак”, які выступіць у Львове 10 жніўня, - у онлайн-інтэрв’ю распавёў сайту festsvabody.org, што значыць для “быць вольным”, ці варта беларускім і ўкраінскім рокерам граць на “карпаратывах” і навошта сучаснай моладзі ведаць сваю гісторыю.
Гутарыла і перакладала Марыя Садоўская
- Што для сучаснага украінскага року абазначае "быць вольным"? Наколькі творца зараз можа быць вольным ад умоўнасцяў шоў-бізу, камерцыі, патрэбнасці ў ратацыі на станцыях? Ці можа залежны чалавек увогуле быць творчай асобай?
- У прынцыпе, рок ва Ўкраіне быў і застаецца вольным, бо гурты маюць магчымасць граць такую музыку, якая ім падабаецца, і спяваць песні пра тое, пра што яны хочуць спяваць. Іншая справа, што значная частка добрай ды цікавай украінскай музыкі не мае магчымасці трапіць да шырокай аўдыторыі. І гэта насамрэч адбываецца таму, што украінская рок-музыка не залежыць ані ад законаў шоў-бізнэсу, ані ад камерцыі або ратацый. Большасць гуртоў паступова, год за годам, крок за крокам заваёўваюць сваю аўдыторыю, месца на сцэнах добрых фестываляў і, не адчайваючыся калі нешта не атрымліваецца, ствараюць добрыя песні і цікавыя альбомы.
Design by Zuker